પાલવની ભાતીગળ કોર

 એમાં ગૂંથ્યો એક મનગમતો મોર;

સખીરી, તારા પાલવની ભાતીગળ કોર.

કોઈ આવીને મારામાં મ્હોરી ગયું;

છાનું છપનું આવીને દિલ ચોરી ગયું,

      આજ જાણ્યું મેં કોણ એનું ચોર;

     સખીરી, તારા પાલવની ભાતીગળ કોર.

પાલવ આ પ્રેમમાં કેવો લહેરાય;

પાંદડા મર્મરતા ગીત મીઠાં ગાય,

     એમાં વાયરાનું ચાલે ના જોર;

     સખીરી, તારા પાલવની ભાતીગળ કોર.

આષાઢી આભ આજ કેવું વરતાય;

ચોપાસે ઢેલડીના  ટહુકા સંભળાય

      પાલવના મોર જોને નફ્ફટ નઠોર;

     સખીરી, તારા પાલવની ભાતીગળ કોર.

-દિનેશ પરમાર