હું તો ભૂલી ગઈ ભાન અને સાન
સાયબાના રંગોમાં એવી ગુલતાન
ખેતર વચાળ એક કેસુડો ઉભો ને લાલઘૂમ લહેરાતો ફોરે,
નજરું નાખો તો એવું લાગે કે નફ્ફટ આ ફાટ ફાટ થાય કોના જોરે ?
હુંય લહેરાતી જાઉં પાન પાન
સાયબાના રંગોમાં એવી ગુલતાન
કેસુડો મ્હોરેને ભમરા પતંગિયા ગાય એના મધમીઠા ગીત
ડાળે બેઠેલ ઓલ્યો પોપટોય એનાથી બાંધી બેઠો છાની પ્રીત
હું ય ગાઉ મારા વાલમના ગાન
સાયબાના રંગોમાં એવી ગુલતાન
સોળે કળાએ ફૂલ ખીલ્યા કેસૂડાના જોઈને સીમ આખી મલકે
મંદ મંદ વાયરામાં મઘમઘતી ફોરમથી હૈયું પનિહારીનું છલકે
હું ય જાણે કેસૂડાનું પાન
સાયબાના રંગોમાં એવી ગુલતાન
-દિનેશ પરમાર
ટિપ્પણીઓ નથી:
ટિપ્પણી પોસ્ટ કરો