પાનખર

આંબા નીચે બેઠેલો હરિયો

વિચારોના ચકડોળે ચડ્યો

એ હેતાને પરણીને આવ્યો 

ત્યારે ફળિયામાં પોતાની સાથે સાથે 

આ આંબો પણ 

કેવો મહેક મહેક થતો હતો...

આ જ આંબા નીચે 

હેતાએ એને પેટ પર હાથ મૂકી 

ખુશખબર આપ્યા'તા ત્યારે

આંબે પણ કેવી માંજરીયો મ્હોરી ઉઠી'તી

થોડા દિવસોમાં

આંબે નાનકડી કેરીઓ ઝૂલતી થઈ...

હેતા પણ લૂમે ઝૂમે હતી...

અને ત્યાં જ...

પીળું પડી ગયેલું આંબાનું પાન 

હરિયાના ખોળામાં પડ્યું.

હરિયો તંદ્રામાંથી સફાળો જાગ્યો...

એની નજર 

ઘરની દીવાલ પર ટીંગાડેલા 

હેતાના ફોટા પર પડી...

પાનખર આવી ગઈ

આંબા પર અને એના જીવનમાં પણ...