ટીન્કુબેન

 ચકલીનું એક બચ્યું નાનું ટીન્કુ એનું નામ

ધમાચકડી ધીંગામસ્તી એ બસ એનું કામ

 

એક દિવસ આ ટીન્કુબેને જીદ ઉડવાની કીધી

હેતથી મમ્મીએ એને ખોળામાં લઇ લીધી

 

મમ્મી બોલી બેટા ટીન્કુ તું હજી છે નાની

મોટા થઈને ઉડવાનું આખી દુનિયા જોવાની

 

ટીન્કુબેન કંઈ મમ્મીની આ વાત ઓછા માને ?

ના હોય મમ્મી ત્યારે ઉડતા શીખે છાને છાને

 

એક સવારે ટીન્કુબેન તો ડાળી ઉપર બેઠા

ઉડવાની જ્યાં કોશિશ કિધી ત્યાં તો આવ્યા હેઠા

 

આ જોયું ને કિંજલબેને લેસન પડતું મુક્યું

ચકલીના બચ્ચાને લઇને માળામાં જઈ મુક્યું